可玩性出乎意料千值练REEDIT Hulkbuster
千值练RE:EDIT系列Iron Man可动figure终于都出到可以同Hulk一战嘅Hulkbuster。不同于市面其他Hulkbuster产品，今次并非用电影版造型，呢点可以讲得上係RE:EDIT系列嘅特色，所以即使有买市面其他Hulkbuster，都唔会同呢只撞款，但首先要知嘅係佢本身吸唔吸引，而家即刻开箱睇睇。
◆ 包装盒保持一贯嘅神秘感觉。
◆ 可以打开睇吓有冇问题先买。
◆ 盒内仲有同系其他Iron Man送嘅基地台座，但呢只Hulkbuster好似放唔落喎！？
◆ 就咁睇的确係有啲上重下轻。
◆ 平时个头係咁。
◆ 打开见到入面嘅Iron Man。（唔可以拆出嚟） 
◆ 个头仲可以上下左右咁拧。
◆ 眼同心口係发蓝光，留意其实只有正面可以睇到一对眼一齐发光。
◆ 咁係因为啲光源来自入面只Iron Man。
◆ 特别嘅係头甲中间仲有一层。
◆ 背部都可以着灯。
◆ 唔好睇小呢两支嘢，係入电位嚟。
◆ 手部就有少少唔太精细。
◆ 手指全部关节可动。
◆ 手掌一样有灯。
◆ 脚仔细细总算企得稳。
◆ 同一支灯，小腿可以发光。
◆ 连膝头下面都有灯。
◆ 再附送专用台座。
◆ Iron Man放埋一齐。
玩后感：
千值练RE:EDIT Hulkbuster打开头部同胸甲见得到Iron Man个头，跟Iron Man本体比较，Hulkbuster比例上係细只啲。电影版Hulkbuster係似Iron Man坐咗喺大型机械人入面，而RE:EDIT Hulkbuster就似喺Iron Man外面再加件装甲咁。大家可以睇吓上面最后一张图，只Hulkbuster其实唔係高大过Iron Man好多，只係加重装甲。
同之前推出嘅War Machine相似嘅地方係，上身比例非常大，下身相对细好多，畀人一种上大下细嘅感觉，嚟到Hulkbuster身上反差就更大。但如果你接受到，就会觉得咁样先更突显到Hulkbuster嗰种力量感。上色方面佢採用咗同RE:EDIT系列第一弹Iron Man Bleeding Edge Armor相同嘅金同金属红色彩，亦即係Hulkbuster身体入面果只，根本係畀大家摆埋佢哋一齐嗰阵衬得到。
市面上好多Hulkbuster figure係论论尽尽，可动性唔太高。但由千值练主理嘅Hulkbuster就畀到玩家好大嘅满足感，因为佢成只嘅可动性唔错，加上头、心口、手掌同埋小腿前后方都可以着灯，可玩性非常高。笔者尤其欣赏佢头部同胸甲可以打开，同时头部亦能够上下左右拧，要摆有型动作更加方便。附送专用台座挂得起成只Hulkbuster，咁就唔使吓吓企定定咁闷。
查询: 千值练
定价: US$305
